كريستيان نجّار

رح خبّركن قصتي بإختصار مع ختيار عنايا يلي كلنا منحبه كتير ومنطلب شفاعته.

لمّا كان عمري ١٢ سنة دخلت بأخوية للصغار بتحمل إسم مار شربل وكنا نجتمع بكنيسة مار شربل - أدونيس اللي هي رعيتي لغاية اليوم وكنت انا بكورال الأخويّة، وهونيك بلّشت رتّل، عند مار شربل.

على عمر الـ ١٧ سنة صار عندي مشكلة بصوتي ونَفَسي وبِقيِت معي تقريباً حوالي الـ ٣ سنين، كانت كتير تزعجني وتأثّر على أدائي.

صليّت من كل قلبي وقلتله لمار شربل :

"صوتي هديّة من يسوع، وإنت قريب منه كتير، صليلي تإشفى وصوتي رح كرسه للخدمة كل عمري".

وهيك صار.

فجأة اتبخّرت المشكلة وما عدت حسيّت بشي أبداً لليوم !!

من وقتها، صرت حب كتير إنو يكون عندي ترانيم خاصة قدّمها لمجد الله بصوتي للقدّيس شربل، هالقديس يلي بلّشت رتّل بكنيسة بتحمل إسمه ، هالقدّيس يلي كان دايماً معي بكل خطوة.

اليوم صار عندي ترتيلتين لشربل، قريباً رح تسمعوهن.

حبيّت اتشارك معكن هالفرحة أصدقائي..

الله يحميكن ♥️

تعليقات